जो भारत-पाकिस्तान को मैच न हो गओ, बर्डवार हो गओ... जहां देखौ दौंथर कटी है! जौन देखौ बोई बर्रा रओ। मोड़ी-मोड़न कै तौ जैसे कामई-धंधा नईयां... एक दम निर्चूं फिर रहे।

इतै लोगन कै मोहल्ला के मुल्ला जी पे शक हो गओ है कि वे कऊं पाकिस्तान को सपोर्ट तौ नईं कर रहे, जासे बेऊ सन्नाए बैठे हैं और सबेरे से 6 दाय कोहली बब्बा और पूरी टीम की बढ़ाई कर चुके हैं, जबकि उनै गेंद-बल्ला को अआ, इईऊ नई आत!

इतै हम लोगन ने जू संग्राम देखन के लाने इंतजाम सोऊ कर्रो करो हैगो। जन्नेटर, बैटरा तईयार धरे हैं, काए सै बत्ती को तो भरोसा है नईयां, कभै लुप्प हो जाए, बुंदेलखंड है जू।

गईयां-भैसियां सोऊ चरन नई गईं, हालांकि उनैं तौ मैच नई देखनै हैगो, लेकिन उनकै चरान वालिन कै तौ देखनै है!

दुकनदार-मजूर आज सबई छुट्टी पे हैंगे और कलेऊ अलेऊ-निपटाकै अभईं सै अपने-अपने ठिकानन पे टिक गए हैं। कछू लोगन ने बाजा सोई मंगा लओ है, कै रए हैं कि मैच जीतन पर नागिन धुन बजाई जैहे और डांस हुइयै।

मंटू नन्ना कितै लड़ुअन को आडर तीन दिना पहलेई दै दओ गओ हतो सो वे तैयार हैं, मैंच के बाद बांटे जैहें। औरतन-लुगाइनऊ नै चौका-बर्तन निपटा लओ है और मैच देखन कै तैयार हैं, लेकिन जब लौ मैच शुरू नई हो रहो, तब लौ बुलउआ संगीत चल रओ है। ढोलक मजीरा बज रए हैं और गाना गब रओ है। 

कुल मिलाकै कायदे को सन्नाटा खिचो है, जा सै हम तौ कै रए कि जा बेर हो जान देओ आरई-पार...  कुल्ल दिनन सै धरती धरें हैगो जो पाकिस्तान। 

जू एकदम सई मौको है कोहली बब्बा, गेंद-बल्लई से जाकै धमक देओ, ता से जा को उचकबो बंद हो जाए। काए से कुल्ल दिनन से जाके चुल्ल मची हमाओ कश्मीर, हमाओ कश्मीर... अब लै लेओ... बाबा जी को...

हम तौ कै रए दै छक्का, दै चऊआ मौ फोर देओ जाको... 

इतै लपट पहलेईं सै बज रई है और जा मैच ने पारो और बढ़ा दओ है। आखिरी में जोई कैहें कि मौको है चूको नईं!